Organizatë sigurie e krijuar mbi bazën e një traktati të nënshkruar më 1954 nga Australia, Britania, Franca, Zelanda e Re, Pakistani, Filipinet, Tajlanda dhe Shtetet e Bashkuara. Synimi ishte të pengonte zgjerimin e komunizmit në Azinë Juglindore në kontekstin e Luftës së Ftohtë.

Mosmarrëveshjet midis anëtarëve, veçanërisht rreth mënyrës së zhvillimit të luftës së Vietnamit, e kufizuan rolin e saj. SEATO nuk arriti t'i frenonte kryengritjet komuniste në Vietnam dhe Kamboxhia dhe nuk u shndërrua në një mekanizëm të bashkuar ushtarak me efektivitetin që kishin shpresuar themeluesit. Organizata u shpërbë zyrtarisht më 1977.