Dy traktate të nënshkruara në Romë më 25 mars 1957 nga Belgjika, Holanda, Luksemburgu, Franca, Republika Federale e Gjermanisë dhe Italia. Njëri themeloi Bashkësinë Ekonomike Evropiane, BEE, ndërsa tjetri Bashkësinë Evropiane të Energjisë Atomike, të njohur si Euratom. Ato hynë në fuqi më 1 janar 1958.

Traktati i BEE-së vendosi bazat e një tregu të përbashkët dhe të zgjerimit të bashkëpunimit ekonomik ndërmjet vendeve anëtare. Bashkësia Ekonomike Evropiane u bë një nga bazat institucionale të zhvillimit të mëvonshëm të Bashkësisë Evropiane dhe të Bashkimit Evropian. Euratom-i synonte bashkëpunimin në përdorimin paqësor të energjisë bërthamore.

Nënshkruesit i shihnin këto traktate si vazhdim dhe zgjerim të bashkëpunimit të nisur me Bashkësinë Evropiane të Qymyrit dhe Çelikut, e cila kishte filluar funksionimin më 1952 me të njëjtat gjashtë shtete. Kur përdoret në njëjës shprehja «Traktati i Romës», zakonisht nënkuptohet traktati që krijoi BEE-në.