Fjalë për fjalë, «sundimi i atit». Në historinë e mendimit politik, termi lidhet veçanërisht me Robert Filmer-in, i cili e shpjegonte autoritetin politik si vazhdim të autoritetit atëror të dhënë nga Perëndia. Sipas doktrinës së tij, pushteti kalonte nga Adami, përmes mbretërve të Izraelit, te monarkët e mëvonshëm dhe përligjte të drejtën hyjnore të mbretërve.

Në mendimin feminist, patriarkati emërton marrëdhënie, institucione dhe praktika që u japin përparësi ose autoritet burrave ndaj grave, etërve ndaj nënave dhe bijve ndaj bijave. Kjo përparësi mund të mbrohet me një doktrinë të shprehur ose të riprodhohet si zakon i marrë si i mirëqenë. Praktika patriarkale mund të vazhdojnë edhe në shoqëri që shpallin barazi mundësish, prandaj analiza përqendrohet edhe te marrëdhëniet reale të pushtetit përtej rregullave formale.