Claude Adrien Helvétius, 1715–1771, ishte mendimtar i Iluminizmit francez, i lidhur me zhvillimin e ideve utilitariste. Ai ndikoi ndjeshëm te Jeremy Bentham-i. Disa kritikë e kanë vlerësuar veprën e tij më shumë për paraqitjen në formë të skajshme e të qartë të ideve të përhapura në mjedisin intelektual të kohës sesa për origjinalitetin ose thellësinë filozofike.

Helvétius mbronte një qëndrim barazimtar: dallimet ndërmjet njerëzve shpjegoheshin kryesisht nga edukimi dhe kushtet që i formojnë, jo nga pabarazi të pandryshueshme të natyrës së tyre. Ai e konsideronte interesin vetjak motivin themelor të veprimit njerëzor. Prej kësaj nxirrte rëndësinë e një organizimi shoqëror që e lidh përfitimin personal me të mirën e përbashkët. Propozimi që çdo familje të kishte një copë tokë synonte pikërisht këtë: njerëzit, duke punuar për interesin e tyre, do të kontribuonin njëkohësisht në mirëqenien e përgjithshme.