Organizatë ndërkombëtare joqeveritare e krijuar më 1961 për mbrojtjen e të drejtave të njeriut. Fillimisht u përqendrua në rastet e burgosjes së padrejtë dhe në mbrojtjen e njerëzve të burgosur për bindjet e tyre. Më pas e zgjeroi veprimtarinë në fushata kundër torturës, dënimit me vdekje, dhunës shtetërore dhe shkeljeve të tjera të të drejtave individuale e kolektive.

Amnesty International mbledh dhe publikon të dhëna mbi shkeljet, u drejton kërkesa autoriteteve dhe mobilizon mbështetje publike për mbrojtjen e personave të prekur. Raportet e saj për gjendjen e të drejtave të njeriut janë përdorur gjerësisht nga politikëbërësit, studiuesit dhe organizatat e shoqërisë civile. Më 1977 organizata mori Çmimin Nobel për Paqen, në njohje të veprimtarisë së saj për dinjitetin njerëzor dhe kundër përndjekjes e torturës.